संखुवासभा । पूर्वी पहाडी जिल्ला संखुवासभामा नै पहिलो पटक संसदीय प्रणालीमा आधारित वादविवाद प्रतियोगिता ‘द डिवेट वार’ हुने भएको छ ।
मंगलबार असल शासन क्लब संखुवासभाले नेपाल पत्रकार महासंघ संखुवासभाको कार्यालयमा पत्रकार सम्मेलन गरि कार्यक्रमको बारेमा जानकारी दिएको हो । आगामी मंसिर १४ गते देखि सुरु हुने यो कार्यक्रम विभिन्न चरणमा सम्पन्न हुने आयोजकले जनाएको छ ।
प्रतियोगिता वर्ड स्कुल डिवेट च्याम्पियनसिप (डव्लुएसडीसी) को नियमानुसार सञ्चालन हुनेछ । कार्यक्रम संयोजक अनुप चापागाईका अनुसार खाँदबारी नगरपालिका भित्रका २१ वटा माध्यमिक विद्यलायका १९ बर्ष मुनिका विद्यार्थीहरु सहभागी हुनेछन् । एक विद्यालयबाट १ छात्रा सहित ३ जना विद्यार्थीहरु सहभागी हुन पाउने संयोजक चापागाईले जानकारी गराए ।
विद्यार्थीहरुको बौद्धिक क्षमता विकास गरेर खोज तथा अनुसन्धान गर्न प्रेरित गरि सामुहिक भावनाको विकास गर्दै आलोचनात्मक चेतनाको अभिवृद्धि गर्नका लागि यो कार्यक्रम गर्न लागिएको संयोजक चापागाईले बताए ।
कार्यक्रममा प्रथम हुने विद्यालयले नगद रु. ३० हजार, शिल्ड, मेडल र प्रमाणपत्र प्राप्त गर्नेछन् भने द्धितिय हुने विद्यालयले नगद रु. १५ हजार, मेडल र प्रमाणपत्र प्राप्त गर्ने आयोजकले जनाएको छ । त्यस्तै सेमिफाईनलिष्ट दुई विद्यालयले नगद रु. ५ हजारका दर, मेडल र प्रमाणपत्र प्राप्त गर्नेछन् ।
