संखुवासभा । सोमबार राति प्रकाशन भएको एसइई परीक्षामा सिम्रन थापा संखुवासभा जिल्ला प्रथम बनेकी छिन् । खाँदबारी नगरपालिका– १ घर भएकी सिम्रनले श्री हिमालय माध्यमिक विद्यालयबाट ४ जिपिए अंक प्राप्त गरी प्रथम बनेकी हुन् ।
सनम थापा र कविता थापाकी छोरीले सामुदायिक विद्यालयमा अध्ययन गरी जिल्लाका उत्कृष्ट संस्थागत निजी विद्यालयहरूलाई पछि पार्दै प्रथम बनेकी हुन् । सिम्रनको बुबा सनम थापा श्री महेन्द्र माध्यमिक विद्यालय मानेभञ्ज्याङका सहायक प्रधानाध्यापक हुन् । उनी माध्यमिक तहका शिक्षक हुन् ।
संखुवासभामा ७५ वटा माध्यमिक विद्यालयबाट दुई हजार ३२९ जना सहभागी भएकोमा तीमध्ये एक हजार ६७ जना अर्थात् ४५.८१ प्रतिशत उत्तीर्ण भएको शिक्षा विकास तथा समन्वय इकाइ संखुवासभाका सूचना अधिकारी एकराज थापामगरले जानकारी दिए ।
