कोशी प्रदेशका मुख्यमन्त्रीमा नेकपा एमाले संसदीय दलका नेता हिक्मतकुमार कार्की कोशी प्रदेशको मुख्यमन्त्री नियुक्त भएका छन्। उनले आजै पद तथा गोपनीयताको शपथ पनि लिएका छन्।
कार्की दोस्रोपटक मुख्यमन्त्री नियुक्त भएका हुन्। गत पुस २४ मा दोश्रो प्रदेशसभाको पहिलो सरकारको नेतृत्व गर्न मुख्यमन्त्री बनेका कार्कीले विश्वासको मत पाउन सफल भएनन्। प्रदेशसभाबाट विश्वासको मत पाउन असफल उनी असार १५ मा पदमुक्त बनेका थिए।
अहिले सर्वोच्चले उद्धव थापा नेतृत्वको सरकारले लिएको विश्वासको मत असंवैधानिक ठहर गरेपछि कार्की दोश्रो पटक मुख्यमन्त्री नियुक्त भएका हुन्। शुक्रबार प्रदेश प्रमुख पर्शुराम खापुङले उनलाई संविधानको धारा १६८ को उपधारा ३ अनुसार मुख्यमन्त्री नियुक्त गरेका हुन्।
कार्कीलाई प्रदेश प्रमुख खापुङले पद तथा गोपनीयताको शपथ पनि दिलाएका छन्। मुख्यमन्त्री कार्कीले ३ जना मन्त्री र एक जना राज्यमन्त्री नियुक्त गरेका छन्। तिलकुमार मेन्याङ्वो ऊर्जा, पाँचकर्ण राई वन तथा वातावरण र एकराज कार्की भौतिक पूर्वाधारमन्त्री नियुक्त भएका छन्। यसैगरी सृजना राई सामाजिक विकास राज्यमन्त्री नियुक्त भएकी छन्। उनीहरूले पनि शपथ लिएका छन्।
