संखुवासभा । जिल्लाको पाँचखपन नगरपालिकाका २६ सुकुम्बासी घरपरिवारले जग्गा धनी लालपुर्जा पाएका छन्।
राष्ट्रिय भूमि आयोग संखुवासभाको सहजीकरणमा पाँचखपन नगरपालिका भित्रका भूमिहिन दलित तथा सुकुम्बासी घरपरिवारहरुलाई जग्गा उपलब्ध गराएको हो ।
राष्ट्रिय भूमि आयोग संखुवासभाका अध्यक्ष शंकरमान कँडेलको अध्यक्षता तथा संखुवासभाका संघीय सांसद दीपक खड्काको उपस्थितिमा आयोजित एक कार्यक्रम बीच जग्गा धनी लालपुर्जा वितरण गरिएको हो । भूमिहिन तथा सुकुम्बासी छनौटको विभिन्न चरणहरु पार गरेर उनीहरुलाई जग्गा उपलब्ध गराईएको पाँचखपन नगरपालिकाका प्रमुख विपिन राईले जानकारी दिए ।
नगर कार्यपालिकाको बैठकले २८ जनाको नाम सिफारिस गरेर पठाएकोमा २ जनाको विवरण माथि थप अध्ययन गर्नुपर्ने भएकाले तत्काल २६ जनालाई मात्र लालपुर्जा वितरण गरिएको नगरप्रमुख राईले जानकारी दिए । बाँकी २ परिवारले पनि जग्गा पाउने वा नपाउने बारेमा छिट्टै टुङ्गो लगाइने नगर प्रमुख राईको भनाइ छ ।
सुकुम्बासीहरुलाई पाँचखपन नगरपालिकाको केन्द्रमा रहेको सरकारी जग्गा उपलब्ध गराइएको हो । पाँचखपन नगरपालिकाको वाना बजारदेखि सभापोखरी गाउँपालिका जाने मुख्य सडक किनारको जग्गा उनीहरुलाई उपलब्ध गराइएको छ । उनीहरुले पाएको जग्गा सम्याएर चाँडै घर निर्माण गर्ने प्रकृया सुरु गरिने नगरपालिकाले जनाएको छ ।
घर निर्माण गर्नको लागि घडेरी सम्याउने र घर निर्माणको लागि समेत नगरपालिकाले सहयोग गर्ने नगर प्रमुख राईले प्रतिवद्धता जनाए । ‘ब्यापार ब्यावसाय गरेर पनि जीविका चलाउन सकोस् भनेर बजार क्षेत्रको मुख्य सडक किनारको जग्गा दिएका छौँ, उहाँहरुको घर निर्माण गरि स्वरोजगार बन्न पनि पालिकाले सहयोग गर्छ’, नगर प्रमुख राईले भने ।
भूमिहिन तथा सुकुम्बासीहरु यस अघि आफन्त तथा गाउँलेहरुको जमिनमा आश्रय लिएर बस्दै आएका थिए । अहिले भने उनीहरु करेसाबारी सहित एक घर अट्ने जमिनको मालिक बनेका छन् ।
यसरी प्राप्त भएको जमिन कम्तिमा १० बर्षसम्म विक्रि गर्न नपाउने र त्यसपछि पनि भूमिहिन हुने गरि बेच्न नपाउने ब्यवस्था गरिएको राष्ट्रिय भूमी आयोग संखुवासभाका अध्यक्ष शंकरमान कँडेलले बताए । उनले जिल्लाको अन्य ९ स्थानीय तहहरुमा पनि भूमिहिन तथा सुकुम्बासीहरुको लगत संकलन भईरहेको बताए ।
