संखुवासभा । संखुवासभाको सिलीचोङ गाउँपालिकाले आगामी आर्थिक बर्ष २०८३/०८४ को नीति तथा कार्यक्रम सहित बजेट सार्वजनिक गरेको छ ।
बुधबार सिलीचोङ गाउँपालिकाले ४८ करोड ६९ लाख ९१ हजार ४१ रुपैयाको बजेट सार्वजनिक गरेको हो । सिलीचोङ गाउँपालिकाका अध्यक्ष भूपालराज मेवाहाङले बुधबार आगामी आर्थिक बर्ष २०८३/०८४ को नीति तथा कार्यक्रम सभामा पेश गरेको हो । अध्यक्ष मेवाहाङले पेश गरेको नीति कार्यक्रम माथि छलफल भइरहेको छ ।
उक्त सिलीचोङ गाउँपालिकाको १९ औं गाउँसभामा उपाध्यक्ष देविता कुलुङले आगामी आर्थिक बर्षका लागि बिनियोजन गरेको बजेट सार्वजनिक गरेको हो । संघीय सरकार र प्रदेश सरकारबाट वित्तिय हस्तान्तरण भएका शसर्त, समपुरक र विशेष अनुदान गरि २३ करोड २५ लाख रुपैया रहेको छ भने सिलीचोङ गाउँपालिकाको आन्तरिक स्रोत बित्तिय समानिकरण, राजश्व बाँडफाँड, आन्तरिक अल्या र आन्तरिक राजश्व गरि २५ करोड ४४ लाख रुपैया गरि कुल ४८ करोड ६९ लाख ९१ हजार ४१ रुपैयाको बजेट सार्वजनिक गरेको हो ।
सिलीचोङ गाउँपालिकाले भौतिक पूर्वाधार विकास, शिक्षा र स्वास्थ्यलाई प्राथमिकतामा राखेर बजेट ल्याएको छ । समृद्ध सिलीचोङ बनाउने अभियानमा आफूहरु निर्वाचीत भएर आएदेखि नै लागिपरेको र विभिन्न ठूला योजनाहरु संघ र प्रदेश सरकारको समन्वयमा अघि बढेको सिलीचोङ गाउँपालिकाका अध्यक्ष भूपालराज मेवाहाङले बताए ।
१० असारमा स्थानीय तहले अनिवार्य नीति तथा कार्यक्रम सहित बजेट सार्वजनिक गर्नुपर्ने सवैधानिक नियमअनुसार संखुवासभाको १० वटै स्थानीय तहले नीति कार्यक्रम सहित बजेट सार्वजनिक गरेको हो ।
