संखुवासभा । खाँदबारी नगरपालिकाले वडा–वडामा तेस्रो चौमासिक भत्ता वितरण गरिरहेको छ ।
विहिबार खाँदबारी नगरपालिकाको वडा नं. १० र ११ वडामा भत्ता वितरण गरिएको हो । एक कार्यक्रम बीच जेष्ठ नागरिकहरुलाई खाँदबारी ११ नम्बर वडाका वडाध्यक्ष अनिल राई र राष्ट्रिय वाणिज्य बैंक खाँदबारी शाखाका प्रबन्धक गुरुप्रसाद राईले संयुक्त रुपमा भत्ता वितरण गर्दै कार्यक्रमको शुरुवात गरेका थिए ।
त्यसैगरि खाँदबारी १० नम्बर वडामा वडाध्यक्ष वेदबहादुर चौहान र राष्ट्रिय वाणिज्य बैंक खाँदबारी शाखाका प्रबन्धक गुरुप्रसाद राईले संयुक्त रुपमा भत्ता वितरण गरेका थिए ।
वडा–वडामा नै भत्ता वितरण गर्न थालेपछि धेरै सजिलो भएको खाँदबारी नगरपालिका ११ नम्बरका वडाध्यक्ष अनिल राईले बताए । उनको अनुसार, खाँदबारी ११ नम्बर वडामा २ सय ८७ जना सामाजिक सुरक्षा भत्ता वितरण गरिएको बताए ।
यता खाँदबारी–१० नम्बर वडामा ३ सय ८३ जनालाई भत्ता वितरण गरिएको वडाध्यक्ष वेदबहादुर चौहानले जानकारी दिए ।
वडास्तरमा नै भत्ता पाएपछि जेष्ठ नागरिक, बृद्धबृद्धा र असक्तहरुलाई सजिलो भएको उनीहरुको भनाइ छ । खाँदबारी नगरपालिकाले बैशाख ११ गते विहीबार वडा नं. ११ र १०, बैशाख १२ गते शुक्रबार वडा नं. ५ र ६ र बैशाख १३ गते शनिबार वडा नं. ४ र २ मा वितरण गरिने खाँदबारी नगरपालिका मेयर महेश थपलियाले बताए । उनले खाँदबारी नगरभित्रका दुर्गममा पर्ने वडाहरु २, ४, ५, ६, १० र ११ मा वडामा नै पुगेर भत्ता वितरण गर्ने गरेको बताए ।
खाँदबारी नगरपालिका र राष्ट्रिय वाणिज्य बैंक खाँदबारी शाखा बीच वडा–वडामा नै सामाजिक सुरक्षा भत्ता वितरण गर्ने सम्झौता गरिएको छ । तीन बर्ष अघि देखि निरन्तर रुपमा वडामा नै पुगेर त्ता वितरण गर्ने काम भइरहेको छ ।
