संखुवासभा । जिल्लाको मकालु गाउँपालिकामा जारी अन्तरपालिकास्तरीय भलिवल प्रतियोगिताको उपाधी पाँचखपन नगरपालिकाले जितेको छ ।
शनिबार भएको फाइनल खेलमा भोजपुरको षडानन्द नगरपालिकालाई हराउर्दै संखुवासभाको पाँचखपन नगरपालिकाले उपाधी जितेको हो । पाँचखपनले २७–२५, २५–२३ र २५–२२ को सोझो सेट अन्तरमा षडानन्दलाई हराएको हो । छिमेकी पालिका षडानन्द नगरपालिकाले उपविजेतामा नै चित्त बुझाए ।
त्यसैगरि तेस्रो स्थानका संखुवासभाको सभापोखरी र भोटखोला गाउँपालिका बीच प्रतिस्पर्धा भएको थियो । सभापोखरीले २५–२२, २५–१३ को सोझो सेटमा भोटखोलालाई हराएका थिए ।
विहीबार देखि शुरू भएको प्रतियोगिताको शनिबार समापन भएको हो । प्रतियोगितामा आयोजक मकालु गाउँपालिका (ए) र (वि) दुई टिम, सभापोखरी, भोटखोला, पाँचखपन र भोजपुरको षडानन्द नगरपालिका गरि ६ टिमको सहभागीता रहेको थियो ।
प्रतियोगिताको विजेतालाई एक कार्यक्रम बीच मकालु गाउँपालिकाका अध्यक्ष ओङ्दीछिरिङ शेर्पाले नगद २ लाख ५० हजार, शिल्ड, मेडल र प्रमाणपत्र प्रदान गरे । त्यसैगरि उपविजेतालाई नगद १ लाख २५ हजार, शिल्ड, मेडल र प्रमाणपत्र प्रदान गरे भने तेस्रो स्थान प्राप्त गर्नेलाई नगद ६० हजार, शिल्ड, मेडल र प्रमाणपत्र प्रदान गरेका थिए । त्यसैगरि सान्त्वनालाई नगद ४० हजार, शिल्ड, मेडल र प्रमाणपत्र प्रदान गरिएको थियो ।
मकालु गाउँपालिकाले मकालु महोत्सव तथा दक्षिण एसियाली साहित्यिक साँस्कृतिक सम्मेलनको अवसरमा बुधबार देखि आज (शनिबार) सम्म भलिवलका साथै विभिन्न कार्यक्रमहरुको आयोजना गरेको थियो । महोत्सवका सबै कार्यक्रम समापन भएको गाउँपालिकाले जनाएको छ ।
