कार्यसम्पादन मूल्याङकन :
कार्यसम्पादन मूल्याङकनमा संखुवासभाका १० स्थानीय तहमध्ये चिचिला गाउँपालिका प्रथम, सभापोखरी अन्तिम

संखुवासभा । पूर्वी पहाडी जिल्ला संखुवासभाको १० वटा स्थानीय तहमध्ये कार्यसम्पादन मूल्याङकनको आधारमा चिचिला गाउँपालिका प्रथम बनेको छ । 

प्राकृतिक स्रोत तथा वित्त आयोगले गत आर्थिक वर्ष २०७९/८० मा गरेको कार्यसम्पादन मूल्याङकनको नजिता बुधबार सार्वजनिक गरेको हो । सो नजिता अनुसार चिचिला गाउँपालिका जिल्लाकै उत्कृष्ट सहित प्रथम बनेको छ भने सबैभन्दा अन्तिम सभापोखरी गाउँपालिका बनेको छ । नगरपालिका तर्फ खाँदबारी नगरपालिका अगाडी रहेको छ । 

कार्यसम्पादन मूल्याङकनको नजिता अनसार, चिचिला गाउँपालिकाले ४३ दशमलव २ प्रतिशत अंक प्राप्त गर्दै जिल्लाकै प्रथम बनेको हो भने खाँदबारी नगरपालिकाले ३८ दशमलव ३९ प्रतिशत अंक सहित जिल्लामा दोस्रो र नगरपालिका तर्फ प्रथम बनेको छ । त्यसैगरि सिलिचोङ गाउँपालिका ३३ दशमलव ५७ प्रतिशत, मकालु गाउँपालिका ३२ दशमलव ७२ प्रतिशत अंक प्राप्त गरेको छ । त्यसैगरि चैनपुर नगरपालिकाले ३१ दशमलव ६२ प्रतिशत र भोटखोला गाउँपालिका २५ दशमलव ६६ प्रतिशत अंक प्राप्त गर्दै छैटौं भएको छ । 

त्यसैगरि मादी नगरपालिका २४ दशमलव १३ प्रतिशत अंक प्राप्त गरेको छ भने पाँचखपन नगरपालिका २२ दशमलव १४ प्रतिशत अंक प्राप्त गरेको छ । त्यसैगरि नवौं स्थानमा धर्मदेवी नगरपालिका पुगेको छ जसले २१ दशमलव १७ प्रतिशत अंक प्राप्त गरेको छ । जिल्लाको सबैभन्दा अन्तिम सभापोखरी गाउँपालिका बनेको छ, सभापोखरीले १० दशमलव ३० प्रतिशत अंक प्राप्त गरेको छ । 

आयोगले प्रदेश तथा स्थानीय तहको कार्यसम्पादन मूल्याङकन कार्यविधि २०७८ अनुसार विभिन्न १७ सूचकको आधारमा मूल्याङकन गरेको जनाएको छ । जसमा असार १० भित्र बजेट पेश गरे/नगरेको, असार मसान्त भित्र बजेट पारित गरे/नगरेको, आय व्ययको प्रक्षेपण पुस मसान्तभित्र अर्थ मन्त्रालयमा पेश गरे/नगरेको, बजेटको वर्षिक समिक्षा गरी कार्तिक मसान्तभित्र सार्वजनिक गरे÷नगरेको, विनियोजित रकम अनुसार खर्चको व्यवस्था, बेरुजुको अवस्था स्थानीय सञ्चित कोष व्यवस्थापन प्रणाली (सूत्र)को प्रयोग गरे/नगरेको जस्ता सूचकहरुका आधार मुल्याङकन गरिएको छ ।

त्यस्तै, आवधिक योजना तर्जुमा गरे÷नगरेको, कक्षा १ देखि ८ सम्म खुद विद्यार्थी भर्ना दर, कक्षा–८ को तुलनामा कक्षा–९ मा विद्यार्थी टिकाउ दर, सामुदायिक विद्यालयबाट कक्षा १० मा १.६ भन्दा वा सो भन्दा उच्च जीपीए प्राप्त गरेका विद्यार्थी प्रतिशत, ४ पटक गर्भजाँच गरेका महिलाको अनुपात, कुल गर्भवतीमध्ये स्वास्थ्य संस्थामा सुत्केरी हुने महिलाको अनुपात, पूर्ण खोप पाएका बालबालिकाको अनुपात लगायतका सूचकहरु रहेका छन् ।

स्थानीय तहलाई संघीय संचित कोष तथा प्रदेश संचित कोषबाट प्रदान गर्ने वित्तीय समानीकरण अुनदान अन्तर्गत् कार्यसम्पादन मूल्याङकनका आधारमा अनुदान सिफारिसको लागि आयोगले कार्यसम्पादन मूल्याङकन गर्नेछ । आयोग संवैधानिक निकाय हो । सो आयोगले संघीयता संघ, प्रदेश र स्थानीय तहहरुको राजस्व बाँडफाँड लगायत सम्पूर्ण विवरण र प्रतिवेदन हेरेर देशभरका ७५३ स्थानीय तहको नजिता सार्वजनिक गर्ने गर्दछ ।