संखुवासभा । जिल्लाको खाँदबारी नगरपालिकाले हिन्दुहरुको महान पर्व तीजको खर्च कटाएर जिल्ला अस्पताल संखुवासभालाई झुल र फलफुल वितरण गरेको छ ।
शुक्रबार एक कार्यक्रम बीच खाँदबारी नगरपालिकाका मेयर महेश थपलिया, उपमेयर महेश्वरा श्रेष्ठ बज्राचार्यले संयुक्त रुपमा अस्पताल विकास समितिका अध्यक्ष तथा जिल्ला समन्वय समितिका प्रमुख सुमन शाक्य र निमित्त मेडीकल सुपरीटेन्डेण्ड डा. प्रनाम जयरुलाई हस्तान्तरण गरेका थिए ।
खाँदबारी नगरपालिकाका उपमेयर महेश्वरा श्रेष्ठ बज्राचार्यले तीज पर्वको नाममा खाएर बजेट सकाउनु भन्दा पनि जिल्लामा डेंगीको महामारी बढिरहेको समयमा केही सहयोग गरौं भनेर ५० थान झुल र फलफुल वितरण गरिएको बताईन् ।
कार्यक्रममा अस्पताल विकास समितिका अध्यक्ष तथा जिल्ला समन्वय समितिका प्रमुख सुमन शाक्यले नगरपालिकाले निकै राम्रो काम गरेको भन्र्दै धन्यवाद दिए । उनले डेंगीको महामारी बढिरहेको बेला नगरपालिकाले झुल वितरण गरेर उदाहरणीय काम गरेको बताए ।
डेंगी, स्क्रबटाइपस, भाइरल ज्वरो लगायतका कारण जिल्ला अस्पतालमा बिरामीको चाप अत्यधिक बढेको छ । ५० बेडको अस्पताल भएपनि नयाँ भवन निर्माण सम्पन्न नहुदाँ पुरानै भवनमा बस्न बाध्य रहेको छ ।
उक्त कार्यक्रमका खाँदबारी नगरपालिकाका मेयर महेश थपलिया, उपमेयर महेश्वरा श्रेष्ठ बज्राचार्य, प्रमुख प्रशासकीय अधिकृत निर्माणकुमार कार्की, सामाजिक विकास अधिकृत खेमराज निरौला, शिक्षा शाखा प्रमुख दिपकमणी घिमिरे, महिला विकास शाखा प्रमुख शारदा नेपाल, प्रशासकीय अधिकृत दिनेश कट्टेल, लेखा अधिकृत रुद्रमणी श्रेष्ठ, अस्पताल विकास समितिका अध्यक्ष सुमन शाक्य, निमित्त मेडीकल सुपरीटेन्डेण्ड डा. प्रनाम जयरु, स्वास्थ्य कार्यालयका प्रमुख नारदमुनी सुवेदी, जनस्वास्थ्य अधिकृत पशुपति खनाल, रेडक्रस सभापति सरोजकुमार बज्राचार्य, खाँदबारी नगरपालिकाका कार्यपालिका र वडासदस्यहरु, पत्रकार महासंघका अध्यक्ष इन्द्र गिरी लगायत पत्रकारहरु र सरोकारवालाहरुको उपस्थिती रहेको थियो ।
