संखुवासभा । जिल्लाको सदरमुकाम खाँदबारीमा संचालनमा रहेको तेजरत्न आँखा तथा कान उपचार केन्द्रलाई आफन्तको नाममा ५० लाख रुपैया सहयोग हस्तान्तरण गरेको छ ।
आइतबार एक कार्यक्रम बीच स्वर्गीय तेजबहादुर श्रेष्ठ र रत्नकुमारी श्रेष्ठका पाँच भाइ छोराहरु सोहनकुमार श्रेष्ठ लगायत परिवारले दिवंगत आमाबुवाको नाममा ५० लाखको चेक हस्तान्तरण गरेका थिए ।
सबै मानिसहरुले आँखाको ज्योती गुमाउन नपरोस् भनेर तेजरत्न आँखा तथा कान उपचार केन्द्रलाई रकम सहयोग गरेको दाता सोहनकुमार श्रेष्ठले बताए । उक्त उपचार केन्द्रलाई ६ रोपनी जग्गापनि श्रेष्ठ दाजुभाईले नै उपलब्ध गराएका हुन् भने त्यहाँ चाहिने औजार उपकरण, बेड र फर्निचरहरु समेत उनीहरुले हस्तान्तरण गरेका थिए । गरिव, असहाय, दलित र विपन्न बर्गको उपचारमा खर्च गर्ने गरी मुद्धति खातामा रकम रहने गरि सहयोग गरिएको जनाएको छ । सोहनकुमार खाँदबारीमै ब्यापार ब्याबसाय गर्छन् भने मनोजकुमार लामो समय देखि अमेरिका बस्र्दै आएका छन् । दुबै दाजुभाइका छोराछोरी र बुहारी समेत अमेरिकामा नै चिकित्सक रहेका छन् ।
नेपाल नेत्रज्योती संघ आँखा तथा कान उपचार केन्द्रका अध्यक्ष अनन्तकुमार गौलीले दाताबाट प्राप्त रकमलाई सहि सदुपयोग गरिने बताए । उपचार केन्द्रमा अतुलनीय योगदान पु-याएकै कारणले बुवा र आमाको नामबाट तेजरत्न आँखा तथा कान उपचार केन्द्र बनेको समितिका अध्यक्ष गौलीले बताए । यो उपचार केन्द्र चाँडै नै सर्जिकल अस्पतालको रुपमा विकास गर्न आफूहरु लागि परेको समितिको भनाइ छ ।
उक्त कार्यक्रममा नेत्रज्याती संघका केन्द्रीय कोषाध्यक्ष, कोशी प्रदेशका अध्यक्ष श्यामसुन्दर उदास, धनकुटा, भोजपुर र ताप्लेजुङ लगायत ६/७ वटा जिल्लाका अध्यक्षहरु समेत कार्यक्रममा आएका थिए ।
संखुवासभामा तेजरत्न आँखा तथा कान उपचार केन्द्रले निकै फड्को मार्दै गएको छ । सदरमुकाम खाँदबारीका साथै चैनपुर, धर्मदेवी, सिलिचोङ, मकालु र सभापोखरी गाउँपालिकामा शाखा कार्यालय स्थापना गरि सेवा शुरुवात भईसकेको छ । जिल्लाको १० वटै स्थानीय तहमा आँखा तथा कानको उपचार केन्द्र स्थापना गरिने जनाएको छ । जिल्लामा आँखा तथा कानको उपचार केन्द्र भएपछि स्थानीय नागरिकहरुले सेवा लिर्दै आएका छन् । तेजरत्न आँखा उपचार केन्द्रमा वार्षिक करिब ४ हजार आँखाका रोगी उपचारका लागि आउने गर्छन् ।
