संखुवासभा । जिल्लाको खाँदबारी–४ पांमा आयोजित स्वास्थ्य शिविरबाट दुई सय १० जना स्थानीय लाभान्वित भएका छन् ।
सोमबार खाँदबारी–४ गैरीपांमा स्थित स्वास्थ्य केन्द्रमा हेल्पीङ्ग हेण्ड्स नेपालको मुख्य सहयोग, मनकामना अस्पताल तुम्लिङटारको सहकार्यमा लोहोरुङ्ग राई समाजको आयोजनामा भएको एकदिने निःशुल्क स्वास्थ्य शिविरमा स्थानीयले सेवा पाएका हुन् ।
हेल्पीङ्ग हेण्ड्सका अन्तराष्ट्र्रिय अध्यक्ष तथा समाजसेवी नारायण श्रेष्ठ तथा उनको धर्मपत्नी सिर्जना श्रेष्ठको उपस्थितिमा स्वास्थ्य शिविरको आयोजना गरिएको हो । उक्त शिविरमा आँखा परिक्षण, जेनरल फिजिसिशन, दन्त सेवा, ईसिजी सेवा, आङ खस्ने समस्या, निःशुल्क चश्मा तथा औषधी समेत वितरण गरिएको थियो । शिविरमा विभिन्न विधाका चिकित्सकहरु उपस्थित भएका थिए । सो शिविरमा गाउँ–गाउँबाट बालबालिका, महिलाहरुका साथै बृद्धबृद्धाहरु लौरो टेकेर स्वास्थ्य चेकजाँचका लागि आएका थिए ।
निःशुल्क स्वास्थ्य शिविरमा १सय ५० जना महिला र ६० जना पुरुष गरि २ सय १० जना स्थानीय र बुढापाकाहरुले निःशुल्क सेवा पाएको अध्यक्ष नारायण श्रेष्ठले बताए । उनले विभिन्न रोगबाट पिडित भएका बिरामीहरुको स्वास्थ्य परिक्षण, औषधी बितरण तथा उपचार गरिएको बताए ।
संखुवासभाको अधिकाँस स्थानीय पालिकाका धेरै वडाहरुमा समेत निःशुल्क स्वास्थ्य शिविर संचालन गर्दै आएको श्रेष्ठले बताए । उनले संखुवासभामा मात्रै नभएर आफुले हेल्पीङ्ग हेण्ड्स र अन्य साझेदार संस्थाहरुसँगको सहकार्यमा सुदुरपश्चिमका धेरै विकट र दुर्गम जिल्लाहरुमा एक हजार बढि निःशुल्क शिविरहरु संचालन गरिसकेको बताए ।
उक्त शिविरमा खाँदबारी नगरपालिकाका उपप्रमुख महेश्वरा श्रेष्ठ बज्राचार्य, खाँदबारी ४ का कार्यवहाक वडाध्यक्ष पवित्रा गुरुङ, नेपाली कांग्रेसका पूर्वजिल्ला सभापति दीपनकुमार श्रेष्ठ, नेपाल पत्रकार महासंघका अध्यक्ष कृष्णराज शाक्य लगायत संचारकर्मीहरुको उपस्थिति रहेको थियो ।
