संखुवासभा । खाँदबारी नगरपालिकाले एकादशी मेलाको अवसरमा सार्वजनिक विदा दिएको छ ।
पूर्वको नै प्रसिद्ध खाँदबारी नगरपालिका–९ अरुणनदी किनारमा रहेको मनकामनाधाममा हरिबोधनी एकादशीको अवसरमा मेला लाग्ने गर्दछ । नगर भित्रको महत्वपूर्ण धार्मिक, साँस्कृतिक तथा पर्यटकीयस्थल भएकाले बर्सेनि नगरपालिकाले सार्वजनिक विदा दिइने गरेको र योबर्ष पनि त्यसैको निरन्तरता भएको मेयर थपलियाले बताए । उनले नगरपालिका मातहतका सरकारी तथा गैरसरकारी कार्यालय, शैक्षिक संस्था बिदा रहने बताए ।
खाँदबारी नगरपालिकाका मेयर थपलियाले सोमबार विज्ञप्ती जारी गर्दै हरिबोधनी एकादशीको अवसरमा भोली (मंगलबार) नगरभित्रका सम्पूर्ण सरकारी कार्यालयहरु बन्द रहने जनाएको हो ।
हरिबोधनी एकादशीको दिन मनकामना परिसरमा विभिन्न मनोरञ्जनात्मक साँगितिक कार्यक्रमहरुको आयोजना गरिएको छ । ‘एकादशी बजारैमा, फन्के रोटी थालैमा...’बोलको गीतबाट मनकामनाधामका बारेमा संसारभर चिनाएको स्वर्गीय गायक खेमराज गुरुङको नाममा बर्सेनि स्मृति साँझको आयोजना गरिएको छ । यो बर्ष मनकामनामा चर्चित गायक शिव परियार लगायत दर्जनौं चर्चित अनुहारहरुले साँगितिक प्रस्तुती रहेको आयोजक तुम्लिङटार स्र्पोटिङ क्लबले जनाएको छ ।
मनकामना बजार ब्यबस्थापन समितिले बजार झकिझकाउ बनाएको छ भने मनकामनामा साँझपख गंगा आरती समेत हुनेछ । एकादशी मेला भब्य रुपमा सम्पन्न गर्न खाँदबारी नगरपालिकाले विशेष प्रायोजन गरेको जनाएको छ ।
हरिबोधनी एकादशीका दिन मनकामनाधामको दर्शन गर्न भारतका विभिन्न स्थानका साथै र झापा, मोरङ, सुनसरी, धनकुटा, भोजपुर र तेह्रथुम लगायतका जिल्लाबाट मेला भर्न आउने गरेका छन् । मेलामा संखुवासभा र भोजपुरका विभिन्न क्षेत्रका मानिसहरुको बाक्लो उपस्थिती रहने गर्दछ । ग्रामीण भेगमा यातायातको सुविधा बढेसँगै मेला भर्न दर्शनार्थीहरु बढेको पाइन्छ ।
