संखुवासभा । जिल्लाको सदरमुकाम खाँदबारीमा रहेको हिमालय माध्यमिक विद्यालयले ७५ बर्ष पुगेको अवसरमा बार्षिकोत्सव तथा हीरक महोत्सव मनाउने तयारीमा जुटेको छ ।
जिल्लाको नै मुटुमा रहेको हिमालय माध्यमिक विद्यालयले भब्य रुपमा बार्षिकोत्सव तथा हीरक महोत्सव मनाउन अन्तिम तयारीमा पुगेको विद्यालयका प्रअ बीरबहादुर राईले जानकारी दिए । उनको अनुसार, यो बार्षिकोत्सवलाई विशेष रुपमा मनाउने अभियान नै बोकेर विद्यालयका एक टोली काठमाडौसम्म पुगेर विभिन्न ब्यक्तित्व र राष्टपति रामचन्द्र पौडेललाई प्रमुख अतिथी बनाउन निमन्त्रणा बोकेर पुगेका थिए । तर, राष्ट्रपति आउने कार्यक्रम भने स्वास्थ्यका कारण तय नभएको जनाएको छ ।
विद्यालयका पूर्वविद्यार्थीहरु अख्तियार दुरुपयोप अनुसन्धान आयोगका प्रमुख प्रेमकुमार राई, निर्वाचन आयोगका प्रमुख दिनेशकुमार थपलिया र विभिन्न मन्त्रालयका सचिव लगायत उच्च ओहोदा ब्यक्तिब्यक्तित्वहरुलाई कार्यक्रममा निमन्त्रणा गरिनुका साथै विद्यालयले विशेष सम्मान समेत गर्न लागेको प्रअ राईले जानकारी दिए ।
विद्यालयको भौतिक सुधार र गौरवपूर्ण ७५ बर्षको हीरक महोत्सव भब्य रुपमा मनाउन र सहयोग गर्न सबैमा अपिल गरिएको विद्यालय ब्यबस्थापन समितिका अध्यक्ष शेरबहादुर पराजुलीले बताए । उनले विद्यालयको विकासका लागि नै यो भब्य आयोजना गरिएको बताए ।
वि.सं. २००६ सालमा स्थापना भएको यो विद्यालयले गौरवपूर्ण ७५ बर्ष पूरा गरेको छ । ७५ औं बार्षिकोत्सव तथा हीरक महोत्सव पूरा गर्नका लागि विभिन्न उपसमितिहरु गठन गरिएको छ । माघ ५ देखि ११ गतेसम्म हीरक महोत्सव संचालन हुनेछ ।
