संखुवासभा । जिल्लाको खाँदबारी नगरपालिका ४ नम्वर वडा कार्यालयमा नै विद्युत्तको महसुल तिर्न शुरु गरिएको छ ।
आइतबार एक कार्यक्रम बीच खाँदबारी नगरपालिका ४ नम्बर वडा कार्यालय अरुणथानमा विद्युत्त महसुल तिर्ने काउन्टरको खाँदबारी नगरपालिकाका नगर प्रमुख महेश थपलिया र विद्युत्त प्राधिकरण खाँदबारी वितरण केन्द्रका प्रमुख शत्रुधन यादवले उद्घाटन गरे ।
खाँदबारी नगरपालिकाका नगर प्रमुख थपलियाले आफूले निर्वाचन ताका नै वडास्तरमा नै विद्युत्तको महसुल तिर्ने सुविधा उपलब्ध गराउने प्रतिबद्धता अनुसार नै काम शुरु गरेको बताए । उनले यसअघि नै खाँदबारी नगरपालिकाभित्रका दुर्गम वडाहरुमा सामाजिक सुरक्षा भत्ता वितरण गर्ने काम समेत शुरु भईसकेको बताए ।
एकिकृत रुपमा वडास्तरमा नै विद्युत्त, खानेपानी र सामाजिक सुरक्षा भत्ता वितरण लगायतका सुविधाहरु उपलब्ध गराइएको नगर प्रमुख थपलियाको भनाइ छ ।
खाँदबारी ४ नम्बर वडाका वडाध्यक्ष विनोदकुमार गुरुङले वडास्तरमा नै विद्युत्तको महसुल तिर्ने सुविधा उपलब्ध भएपछि वडाबासीहरुले सुविधा पाएको बताए । सदरमुकाम खाँदबारीसम्म पुगेर ३० रुपैयाको विजुलीको विल तिर्न पाँच सय रुपैया खर्च गर्नुपर्ने अवस्थाको अन्त्य भएको वडाध्यक्ष गुरुङले बताए ।
खाँदबारी ४ नम्बर वडामा पहिलो सेवाग्राहीको रुपमा धनबहादुर विश्वकर्माले विद्युत्तको महसुल बुझाएका थिए । एकैदिन ४४ जनाबाट ११ हजार ७ सय ४५ रुपैया संकलन भएको थियो ।
विद्युत्त प्राधिकरण खाँदबारी वितरण केन्द्रका प्रमुख शत्रुधन यादवले स्थानीयको मागअनुसार वडास्तरमा नै विद्युत्तको महसुल संकलन गर्न काउन्टर स्थापना गरिएको बताए । उनले ४ नम्बर वडामा हप्ताको दुई दिन आइतबार र सोमबार महसुल संकलन गर्न कर्मचारी पठाइने बताए ।
खाँदबारी नगरपालिकाभित्रका दुर्गम वडाहरु ४ नम्बरका साथै १० र ११ नम्बर वडामा समेत चाँडै विद्युत्तको महसुल संकलन गर्ने काउन्टर स्थापना हुने जनाएको छ । वडास्तरमा नै महसुल संकलन गर्ने काउन्टर स्थापना भएपछि स्थानीयहरुको समय र रकम दुवैको बचत भएको छ । खाँदबारी नगरपालिकाभित्र ११ नम्बर वडाहरु रहेका छन् ।
