संखुवासभा । पूर्वीपहाडी जिल्ला संखुवासभाको सदरमुकाम खाँदबारीमा मुख्यमन्त्री कप राष्ट्रिय पुरुष भलिबल प्रतियोगिता हुने भएको छ।
कोशी प्रदेश खेलकुद विकास बोर्डको आयोजनामा आगामी फागुन १५ देखि १९ सम्म प्रतियोगिता खाँदबारीमा सञ्चालन हुने मंगलबार खाँदबारीमा पत्रकार सम्मेलन गरी जानकारी दिइएको हो।
भलिबल संघ संखुवासभाले संयोजन गर्ने प्रतियोगिताका लागि जिल्ला खेलकुद विकास समिति संखुवासभा र कोशी प्रदेश भलिबल संघको सहकार्य रहेको छ।
संखुवासभामा ऐतिहासिक रूपमा हुन लागेको राष्ट्रिय पुरुष भलिबल प्रतियोगिताको तयारीमा जुटेको संखुवासभा भलिबल संघका अध्यक्ष मेदिनी घिमिरेले जानकारी दिए। उनका अनुसार प्रतियोगितामा विभागीय तीनवटा टिमहरू आर्मी, सशस्त्र र प्रहरीसहित सात प्रदेशका टिम गरी १० टिमको सहभागिता रहनेछ।
प्रतियोगिता सञ्चालन गर्न करिब ४० लाख रुपैयाँ खर्च हुने अनुमान गरिएको संघका अध्यक्ष घिमिरेले बताए। त्यसमा कोशी प्रदेशबाट २० लाख बजेट विनियोजन भएको र बाँकी २० लाख रुपैयाँ संकलन गर्न जुटेको उनको भनाइ छ। जिल्लाका १० वटै स्थानीय तहबाट १-१ लाख रुपैयाँ र अन्य सहयोगीदातहरूबाट संकलन गरिने संघको अपेक्षा छ।
प्रतियोगितको विजेताले ३ लाख रुपैयाँ, उपविजेताले १ लाख ५० हजार रुपैयाँ, तृतीयले ५० हजार रुपैयाँ र चौथो हुने टिमले ३० हजार रुपैयाँ पाउनेछन्। उत्कृष्ट ५ विधामा जनही नगद ५० हजार तथा सर्वोत्कृष्ट पुरस्कार नगद २५ हजार रुपैयाँ पाउनेछन्।
