संखुवासभा । संखुवासभाको सदरमुकाम खाँदबारी बजार र आसपासका क्षेत्रमा अब्यबस्थित र प्रयोगविहिन तारले बजार नै कुरुप हुदैं गएपछि स्थानीय खाँदबारी युथ क्लबले तार हटाउन थालेका छन्।
खाँदबारी नगर क्षेत्रभित्र जथाभावी झुण्डिएका, लत्रिएका तार ब्यवस्थापनका लागि खाँदबारी युथ क्लबले सकृयता बढाएको हो । नेपाल टेलिकम, विभिन्न केवल नेटवर्क र ईन्टरनेट सेवा प्रदायकहरुले बिजुलीको पोललाई लक्षित गरि झुण्ड्याएका तारले खाँदबारी बजारको सौन्दर्य कुरुप बनाएको थियो ।
अब्यवस्थित तारहरुका कारण यातायातका ठूला साधान र वारुण यन्त्र (दमकल) संचालनमा समस्या भएकाले खाँदबारी युथ क्लबले तार ब्यबस्थापनको अभियान संचालन गरेको हो ।
केही महिना अघि देखि तार ब्यवस्थापनमा खटिरहेका युवाहरुले अहिले खाँदबारी नगरपालिका–१ दुरसंचार डाँडा देखि खाँदबारी नगरपालिका–३ मंगलादेवीथान सम्मको अब्यवस्थित तार हटाईसकेका छन् । युवाहरुले तार ब्यवस्थापनका लागि देखाएको सकृयताको अहिले सिंगो बजार र नगरबासीहरुले प्रशंसा गरेका छन् ।
तार ब्यवस्थापनका लागि खाँदबारी नगरपालिकाले समेत सहकार्यको प्रतिबद्धता जनाएको क्लबका महासचिब सुरेन शाक्यले जानकारी दिए । सेवाप्रदायक संस्थाले जथाभावी जडान गरेको तारहरु छरपष्ट हुँदा नगरको कुरुपता बढेको जनगुनासो बढ्न थालेपछि युथ क्लबले अभियानको थालनी गरेको महासचिब शाक्यले बताए ।
अब्यबस्थित तार ब्यबस्थापनका लागि खाँदबारी नगरपालिकाले दमकल उपलब्ध गराएका थिए । युवाहरुले दमकलमा चढेर तार काटेर फ्याक्ने र ब्यबस्थित तरिकाले बाँध्ने काम गरेका थिए ।
