संखुवासभा । जिल्लाको खाँदबारी नगरपालिका वडा नं. १० ले वडाको ६१ जना कृषकलाई हाते ट्याक्टर (मिनिटिलर) र प्लाष्टिक टनेल सहयोग गरेको छ ।
चालु आर्थिक बर्ष २०८०-०८१ को वडा स्तरीय योजना मार्फत कृषकहरुलाई उक्त समाग्रीहरु लागत सहभागीतामा वितरण गरिएको हो । विहिबार एक कार्यक्रम बीच वडा कार्यालयको परिसरमा सामाग्री हस्तान्तरण गरिएको हो । मिनी टिलर (हाते ट्याक्टर)मा ५० प्रतिशत र प्लाष्टिक टनेलमा ६० प्रतिशत अनुदान प्रदान गरिएको १० नम्बरका वडासचिव डिल्लीप्रसाद सुवेदीले जानकारी दिए । उनले हाते ट्याक्टर ११ जना कृषक र प्लाष्टिक टनेल ५० जना छनौटमा परेको बताए ।
वडाभित्रका कृषकहरुको माग प्रस्ताव आह्वान गरि बस्तुस्थितीको आधारमा वडाले कृषक छनौट गरेको थियो । वडाका नागरिकहरुलाई कृषिमा आत्मनिर्भर बनाउने उद्धेश्यका साथ कार्यक्रम अगाडी सारिएको १० नम्बरका वडाध्यक्ष वेदबहादुर चौहानले बताए । उनले अनुदान प्रदान गरिएको कृषकहरुले सामग्रीको सदुपयोगका विषयमा नियमित अनुगमन हुने बताए । वडाबाट विनियोजित ४ लाख ५० हजार र कृषक लागत सहभागीता ४ लाख गरि कुल ८ लाख ५० हजार बजेटबाट सामान खरिद गरि वितरण गरिएको हो ।
१० नम्बर वडाले कृषक लक्षित कार्यक्रम गरेको भन्दै खाँदबारी नगरपालिकाका प्रमुख प्रशासकीय अधिकृत निर्माणकुमार कार्कीले खुशी ब्यक्त गरे ।
१० नम्बरको वडा अध्यक्ष वेदवहादुर चौहानको अध्यक्षतामा भएको कार्यक्रममा खाँदबारी नगरपालिकाका प्रमुख प्रशासकीय अधिकृत निर्माणकुमार कार्की, लेखा अधिकृत रुद्रमणि श्रेष्ठ र जनप्रतिनिधीहरु लगायतको उपस्थिती रहेको थियो ।
