संखुवासभा । चैनपुर नगरपालिका स्तरीय आधारभूत तह हाजिरीजवाफ प्रतियोगितामा बालविकास आधारभूत विद्यालय विजयी भएको छ ।
चैनपुर नगरपालिका वडा नं. ७ मा रहेको बालविकास आधारभूत विद्यालय लामिचौरको ३५ औं वार्षिकोत्सव समारोह तथा अभिभावक दिवसको अवसरमा आयोजित प्रतियोगितामा वालविकास प्रथम भएको हो । प्रतियोगितामा चैनपुर नगरपालिका भित्रका २८ वटा विद्यालयहरुले सहभागिता जनाएका थिए । प्रतियोगितामा सिंहेश्वरी आवि चैनपुर २, ताङलेवा द्धितिय, सरस्वती आवि चैनपुर ९ तृतीय र बालज्योति आवि सल्लेरी चैनपुर १० सान्त्वना भएको थियो ।
बिजेता विद्यालयहरुलाई क्रमशः प्रथम पुरस्कार ५ हजार ५ सय ५५ रुपैंया, द्धितिय पुरस्कार ३ हजार ३ सय ३३ रुपैंया, तृतीय २ हजार २ सय २२ रुपैंया र सान्त्वना पुरस्कार १ हजार १ सय ११ रुपैंया साथमा मेडल र प्रमाणपत्र प्रदान गरिएको थियो ।
विद्यालय व्यवस्थापन समिति अध्यक्ष प्रेमकुमार लिम्बूको सभापतित्वमा भएको कार्यक्रममा चैनपुर नगरपालिका वडा नं. ७ का वडाध्यक्ष नगेन्द्र कार्कीको प्रमुख आतिथ्यतामा भएको थियो । विशिष्ट अतिथिको रुपमा चैनपुर नगरपालिका शिक्षा शाखा प्राविधिक सहायक केशव पोखरेल लगायतको उपस्थितिमा कार्यक्रम सम्पन्न भएको थियो । कार्यक्रममा सहभागी सम्पूर्ण विद्यालयलाई पुरस्कार स्वरूप तीन सय रुपैंयाका दरले समाजसेविद्वय सुजय पौडेल र भिम बहादुर कंडेलले प्रदान गरिएको थियो ।
