संखुवासभा । जिल्लाका खाँदबारी नगरपालिका–४ पांमा स्थित भगीवन्त रंगशालामा आगामी मंसिर २७ देखि आठौं पांमा कप पुरुष फुटबल प्रतियोगिता शुरु हुने भएको छ ।
विहिबार खाँदबारीमा पत्रकार सम्मेलन गरि आयोजक लोहोरुङ क्लबले प्रतियोगिता बारे जानकारी दिएको हो । ‘स्वास्थ्यको लागि खेलकुद : राष्ट्रको लागि खेलकुद’ भन्ने नारासहित किराँतहरुको मौलिक पर्व साकेला उधौली तथा धान्यपूर्णिामाको अवसरमा फुटबल प्रतियोगिताको आयोजना गरिएको हो ।
खेलकुदको विकाससँगै किराँत समुदायको संस्कृतिको उत्थान एवम प्रवद्र्धन गर्ने उद्धेश्यले निरन्तर रुपमा फुटबल प्रतियोगिताको आयोजना गरिएको लोहोरुङ क्लबका अध्यक्ष प्रभुराम राईले बताए ।
उक्त प्रतियोगितामा कोशी प्रदेशभित्रका १० वटा नाम चलेका क्लबहरुले सहभागीता जनाउने भएका छन् । जसमा आयोजक लोहोरुङ क्लब, एडभान्स क्लब, खाँदबारी युथ क्लब, तुम्लिङटार स्पोर्टिङ क्लब, तिनपोखरी समाज क्लब, सेकाहा क्लब, सभापोखरी फुटबल क्लब, मकालु फ्रेण्ड्स, सितलपाटी फुटबल क्लब र आदर्श युथ क्लब झापा रहेको छ ।
प्रतियोगिताका विजेताले नगद २ लाख २ हजार २ सय २२ रुपैया, मेडल, ट्रफी र प्रमाणपत्र रहेको छ भने उपबिजेताले नगद १ लाख १ हजार १ सय ११ रुपैया, मेडल, ट्रफी र प्रमाणपत्र प्राप्त गर्नेछन् । सेमिफाईनलिष्ट दुई टिमले नगद २५÷२५ हजार रुपैया प्राप्त गर्नेछ ।
आगामी मंसिर २७ देखि संचालन हुने प्रतियोगिता पुस १ गते स्थानीय ढाडेबजारको दिन समापन हुने जनाइएको छ । प्रतियोगितामा कुल १२ लाख ३७ हजार रुपैया खर्च हुने अनुमान गरिएको छ ।
