संखुवासभा । पूर्वी पहाडी जिल्ला संखुवासभामा निर्माणाधीन नौ सय मेगावाट क्षमताको अरुण तेस्रो जलविद्युत आयोजनाको मुख्य सुरुङमार्गको प्रधानमन्त्री पुष्पकमल दाहालले ‘ब्रेक थ्रू’ गरेका छन् ।
मंगलबार जिल्लाको मकालु गाउँपालिका–५ आमराङस्थित अडिट–२ को मुख्य सुरुङ मार्गको प्रधानमन्त्री दाहालले ‘ब्रेक थ्रू’ गरेका हुन् । अरुण जलविद्युत्त आयोजनाको ‘ब्रेक थ्रू’ कार्यक्रमलाई सम्बोधन गर्दै प्रधानमन्त्री दाहालले ऊर्जा क्षेत्रको विकासको लागि सरकार लागि रहेको बताए ।
उक्त ‘ब्रेक थ्रू’ कार्यक्रममा प्रधानमन्त्री दाहाल, ऊर्जा जलस्रोत तथा सिंचाई मन्त्री शक्तिबहादुर बस्नेत, संखुवासभाबाट निर्वाचीत प्रदेश साँसद तथा हाल कोशी प्रदेश स्वास्थ्य मन्त्री राजेन्द्र कार्की, नेपालका लागि भारतीय राजदुत नविन श्रीवास्तव, सतलज कम्पनीका अध्यक्ष सुशील शर्मा, भारतीय सतलज कम्पनी एसजेवीएन)का सिइओ अरुण धिमान, नेपाल सरकार उच्च पदाधिकारी, सुरक्षा प्रमुखहरु लगायतको सहभागीता रहेको थियो । प्रधानमन्त्री दाहाल लगायतका उच्च पदाधिकारीहरु हेलिकप्टर मार्फत आमराङमा ओर्लिएका थिए ।
उक्त प्रधानमन्त्री दाहालले ‘ब्रेक थ्रू’ कार्यक्रम सम्पन्न गरि चिचिला गाउँपालिका–३ दिदिङ पुखुवामा रहेको पावारहाउस गृहमा आयोजित सभालाई सम्बोधन गर्ने कार्यक्रम रहेको थियो । तर, मौसम प्रतिकुलताको कारण देखाउर्दै प्रधानमन्त्री दाहाल पावारहाउस क्षेत्रको हेलिकप्टरबाट नै अवलोकन गरेर फर्किएका थिए ।
अरुण तेस्रो जलविद्युत्त् आयोजनाको निर्माणको काम भारतीय सतलज कम्पनी (एसजेवीएन)ले गरिरहेको छ । आयोजनाबाट नेपालले २१ दशमलव नौ प्रतिशत अर्थात् एक सय ९७ मेगावाट बिजुली निःशुल्क पाउने बताइएको छ । आयोजना बनाउन एक खर्ब १५ अर्ब रूपैयाँ लाग्ने अनुमान गरिएको छ । सन् २०२५ भित्र काम सम्पन्न गर्ने लक्ष्य रहेको छ भने हालसम्म पावारहाउस र ड्यामसाइटमा गरि ७५ प्रतिशत भन्दा बढि काम सम्पन्न भईसकेको सतलजले जनाएको छ । अरुण तेस्रो विद्युत् आयोजनामा नेपाली र भारतीयसहित तीन हजार बढी मजदुर कार्यरत छन् ।
