संखुवासभा । नेपाली कांग्रेसका पूर्वकेन्द्रीय सदस्य तथा संखुवासभा कांग्रेसका पूर्वसभापति स्वर्गीय गोपालराज पहाडीको १२ औं स्मृति सभा खाँदबारीमा मनाइएको छ ।
आज सोमबार नेपाल लोकतान्त्रिक आदिवासी जनजाति महासंघ संखुवासभाको आयोजनामा स्मृति सभाको आयोजना गरेको हो । संखुवासभा कांग्रेसका हस्ती, निडर नेता स्वर्गीय गोपालराज पहाडीको १२ औं स्मृति सभामा पहाडीको योगदानका बारेमा कांग्रेस नेताहरूले चर्चा गरेका थिए ।
कार्यक्रमका प्रमुख अतिथि रहेका नेपाली कांग्रेस संखुवासभाका कार्यवहाक सभापति अन्नतकुमार गौलीले पहाडीले कांग्रेसलाई सांगठनिक रूपमा बलियो बनाउन धेरै संघर्ष गरेको बताए । उनले पञ्चायतमा कांग्रेसलाई देख्न नसक्ने अवस्थामा समेत पहाडीले संगठन बचाएर काम गरेको स्मरण गर्दै ०४६ सालको बहुदल प्राप्त गर्न पहाडी जस्ता नेताहरूकै कारणले कांग्रेस बाँचेको र बहुदल प्राप्त भएको बताए ।
कार्यक्रममा दलित संघका केन्द्रीय सदस्य डिपी परियार, कांग्रेस नेताहरु शेरबहादुर बन, हरिश्वर थापामगर, विमन पराजुली, सल्येन नेपाली, कांग्रेस नेतृ उषा कार्की र महिला संघका संखुवासभा सभापति निरू तामाङ बस्नेत लगायतले पहाडीले संखुवासभा कांग्रेस बनाउन निकै ठूलो योगदान गरेको स्मरण गरे । उनीहरुले पहाडीले राष्ट्रिय राजनीतिमा पु¥याएको योगदानको समेत चर्चा गरेका थिए ।
नेपाल लोकतान्त्रिक आदिवासी जनजाति महासंघ संखुवासभाका अध्यक्ष बरूणकुमार गुरूङको अध्यक्षतामा भएको कार्यक्रम सचिव बम राईले संचालन गरेका थिए ।
उक्त कार्यक्रममा कांग्रेस संखुवासभाका पूर्वसभापति दिपनकुमार श्रेष्ठ, कोशी प्रदेश सदस्यद्वय राजेन्द्र घले र कमला घले, प्रेस युनियनका पुर्वसभापति कृष्णराज शाक्य र नेवि संघका केन्द्रीय सदस्य विकास राई लगायत कांग्रेस नेता तथा कार्यकताहरूको उपस्थिति रहेको थियो ।
पहाडीको पूरा नाम गोपालराज दाहाल हो तर उनी गोपालराज पहाडी लेख्थे । उनको जन्म २००२ साल चैत १ गते पिता टिकादत्त दाहाल र कमलादेवी दाहालको कोखबाट मादीमा भएको थियो भने २०७० साल भदौ ३ गते स्वर्गीय भएका थिए । वि.सं. २०३३ साल देखि २०५७ सालसम्म संखुवासभा कांग्रेसको २० बर्ष सभापति बनेका थिए भने ०५६ सालदेखि सास रहुन्जेलसम्म ०७० सालसम्म १४ बर्ष कांग्रेसका केन्द्रीय सदस्य बनेका थिए ।
