संखुवासभा । संखुवासभाको खाँदबारी नगरपालिका–२ चेवाबेसीमा रहेको श्री भद्रकाली आधारभूत विद्यालयका ८७ जना विद्यार्थीलाई सिटिजन्स बैंकले न्यानो स्वीटर वितरण गरेको छ ।
आज शुक्रबार एक कार्यक्रम बीच विद्यालयमा पुगेर बैंकले विद्यार्थीहरुलाई स्वीटर वितरण गरेको हो । कार्यक्रममा खाँदबारी नगरपालिका–२ का वडाध्यक्ष योगेन्द्र थापाले आफ्नो वडाका विद्यालयलाई छनौट गरी विद्यार्थीहरुलाई स्वीटर वितरण गरेकोमा बैंकलाई धन्यवाद दिए । उनले यस्ता राम्रा कार्यक्रमलाई आगामी दिनमा समेत निरन्तरता दिन बैंकलाई आग्रह गरे ।
कार्यक्रममा विद्यालयका प्रधानाध्यापक दिनेश कटुवाल र खाँदबारी–२ का वडा सदस्य सावित्रीदेवी अधिकारीले बैंक परिवारलाई धन्यवाद दिए ।
चिसोको मौसममा विद्यार्थीहरुलाई न्यानो होस भनेर बैंकको सामाजिक उत्तरदायित्व कार्यक्रम अन्तर्गत स्वीटर वितरण गरेको सिटिजन्स बैंक खाँदबारीका शाखा प्रबन्धक ध्रुब गुरुङले बताए । बर्सेनि बैंकले सामाजिक उत्तरदायित्व कार्यक्रम अन्तर्गत विद्यालयमा स्वीटर वितरण गर्दै आएको उनले बताए ।
गत बर्ष सिटिजन्स बैंकले खाँदबारी नगरपालिका ४ सेकाहास्थित श्री कालिका माध्यमिक विद्यालयका विद्यार्थीहरुलाई स्वीटर वितरण गरेको शाखा प्रबन्धक गुरुङको भनाइ छ ।
उक्त स्वीटर वितरण कार्यक्रममा खाँदबारी नगरपालिका २ नम्बर वडाका वडाध्यक्ष योगेन्द्र थापा, विद्यालयका प्रधानाध्यापक दिनेश कटुवाल, वडा सदस्य सावित्रीदेवी अधिकारी र सिटिजन्स बैंकका शाखा प्रबन्धक ध्रुब गुरुङका साथै बैंकका अन्य कर्मचारीहरु र विद्यालय शिक्षक शिक्षिका र विद्यार्थीहरुको उपस्थिती रहेको थियो ।
