संखुवासभा । आगामी राष्ट्रियसभा निर्वाचनमा नेपाली काँग्रेस कोशी प्रदेशबाट सम्भावित ३८ जना उम्मेदवारको नाम सिफारिस गरिएको छ ।
कोशी प्रदेश समितिले मंगलबार बसेको बैठकले सो नाम सिफारिस गरेको हो । प्रदेश समितिका सभापति उद्धव थापाको सभापतित्वमा प्रदेश राजधानी विराटनगरमा बसेको बैठकले जिल्लागत रूपमा आएका सिफारिसलाई आधार बनाई केन्द्रीय समितिमा नाम सिफारिस गरेको हो ।
सिफारिस हुनेमा संघीय सरकारमा यसअघि मन्त्री भइसकेका चारजना छन् । पार्टीका पूर्वमहामन्त्री तथा पूर्वउपप्रधानमन्त्री कृष्णप्रसाद सिटौला, पूर्वमन्त्री महेश आचार्य, डा. मीनेन्द्र रिजाल र सुजाता कोइरालाको नाम सिफारिस भएको छ । त्यसैगरी पूर्वराज्यमन्त्री तथा केन्द्रीय सदस्य तारामान गुरुङ, पूर्वसंघीय सांसद डिला सङ्ग्रौला, नेविसंघ पूर्वसभापति गुरुराज घिमिरे, उमेशजंग रायमाझी, आङगेलु शेर्पा, पूर्वसभासद तथा कोशी प्रदेश उपसभापति टंकप्रसाद राई, विना पौडेल र रुक्मिणी कोइराला लगायत ३८ जनाको पनि नाम सिफारिसमा परेका छन् ।
बैठकले प्रदेशस्तरीय नीति तथा प्रशिक्षण प्रतिष्ठानको संयोजकमा काँग्रेस कोशी प्रदेश समितिका उपाध्यक्ष रमेशजंग रायमाझीलाई नियुक्त गरेको छ । बैठकले काँग्रेसको कोशी प्रदेश सम्मेलन विराटनगरमा गर्ने निर्णय गरेको छ ।
संखुवासभाबाट को–को परे :
संखुवासभाबाट सिफारिस भई गएका पूर्वराज्यमन्त्री तथा केन्द्रीय सदस्य तारामान गुरुङ, पूर्वसाँसद तथा कोशी प्रदेश समितिका उपसभापति टंकप्रसाद राई, पूर्वसाँसदद्धय पासाङ शेर्पा र विना पौडेल, पूर्वजिल्ला सभापति जनक थापा, महिला नेतृ तथा महाधिबेसन प्रतिनिधी उषा कार्की, जिल्ला पार्टी सचिव कुमारबाबु अधिकारी र महासमिति सदस्य मुक्तिसिं राईको नाम प्रदेशबाट संघमा सिफारिस गरेको छ ।
यसअघि नेपाली काँग्रेस संखुवासभाका कार्यवहाक सभापति अन्नतकुमार गौलीले पूर्वसाँसद विना पौडेल, पार्टी सचिव कुमारबाबु अधिकारी र महासमिति सदस्य मुक्तिसिं राई गरि ३ जनाको मात्रै नाम सिफारिस गरेपछि विवाद भएको थियो । त्यसपछि पार्टी सचिव टकमान घलेले माथि उल्लेख भएका ८ जनाको नै नाम कोशी प्रदेश समितिमा सिफारिस गरेको थियो ।
